Өмнөд Каролина мужийн Гринвилл хотын цагдаа нар 8 дугаар сард нас барсан АНУ-ын жүжигчин Хайден Панеттьерегийн хэргийг шалгаж дуусчээ. Түүний нас барсан шалтгааныг санамсаргүй осол гэж дүгнэсэн байна.
Цагдаагийн мэдэгдэлд “Шүүх эмнэлгийн дүгнэлт болон мөрдөн шалгалтын үр дүнг үндэслэн Хайден Панеттьерегийн нас барсан шалтгааныг санамсаргүй осол гэж тогтоолоо” гэжээ. Ингэснээр орон нутгийн түвшний мөрдөн байцаалт албан ёсоор хаагдав.
“Heroes”, “Nashville” цувралаар олонд танигдсан, 36 настай Панеттьере 8 дугаар сард биеэс нь илэрсэн “fentanyl”, “Xanax” болон өөр хэд хэдэн эмийн хорт нөлөөнөөс болж амиа алдсан гэж шүүх эмнэлгийн дүгнэлтэд бичсэн байна.
Гринвилл хотын Цагдаагийн газар өнгөрсөн сард гарсан энэ дүгнэлтийг иш татан Панеттьерегийн үхлийн хэрэгт хийсэн мөрдөн шалгалтаа “дуусгасан” гэж мэдэгджээ.
АНУ-ын мансууруулах бодистой тэмцэх алба “DEA” орон нутгийн мөрдөн шалгалтад нэгдсэн талаар өмнө нь мэдээлж байсан ч тэдний шалгалт дууссан эсэх нь тодорхойгүй байна.
Өөрийн мансууруулах бодист донтох асуудлын талаар өмнө нь нээлттэй ярьж байсан Панеттьере 8 дугаар сарын 16-нд Өмнөд Каролина муж дахь нэгэн байранд ухаангүй хэвтэж байхдаа олдсон байна.
Гринвилл тойргийн Шүүх эмнэлгийн алба өнгөрсөн сард хийсэн мэдэгдэлдээ Панеттьерегийн үхлийг санамсаргүй мансууруулах бодисын хэт хэрэглээ гэж нотолж, үүнд хүчтэй нийлэг опиоид болох “fentanyl” орсон гэж мэдээлсэн. Энэ бодис сүүлийн 5 жилд хэдэн зуун мянган америк хүний амийг авч одоод байна.
Шүүх эмнэлгийн шинжилгээнд мөн эмчийн жороор хэрэглэдэг булчин суллагч “methocarbamol”, зарим сэтгэцийн эрүүл мэндийн эмгэгт хэрэглэдэг сэтгэцэд нөлөөт эм “quetiapine” илэрсэн байна.
Шүүх эмнэлгийн алба мэдээлэхдээ, аврах албаныхан ирэхэд зүрх нь зогссон байсан бөгөөд задлан шинжилгээгээр үхэлд нөлөөлөх биеийн шарх, гэмтэл илрээгүй гэж тэмдэглэсэн байна. Цагдаагийн тухайн өдрийн тайланд Панеттьерегийн хуучин найз залуу Брайан Хикерсон түүнд хүч хэрэглэдэг байснаа өмнө нь хүлээн зөвшөөрсөн, мөн тэр үед ахтайгаа хамт аврах албаныхан ирэх үед байсан гэжээ.
Эх сурвалж: BBC
