Даймлер Трак компани хүнд даацын автомашины ослоос сэргийлэх шинэ үеийн аюулгүй байдлын технологио танилцуулжээ.
Радар, камер, программ хангамж хослуулсан системүүд нь жолоочид аюулыг таньж, мөргөлдөхөөс зайлсхийхэд туслах зориулалттай.
Компани 9 дүгээр сард зарласан шинэ технологиудаа Мерседес-Бенц Актрос, Арокс ачааны машин, Мерседес-Бенц, Сетра аяллын автобусанд зориулан 2027 оны 4 дүгээр сараас нэвтрүүлэхээр төлөвлөжээ. Харин Хойд Америкт Фрейтлайнер Каскадиа, Вестерн Стар “X-series” загварт зориулсан шинэчлэлийг бэлтгэж байна.
Эргэх, эгнээ солих үед жолоочид тусална
2026 оны 4 дүгээр сард зарласан Каскадиагийн шинэчлэлд “Active Brake Assist 6”, “Cross Traffic Assist”, зүүн эргэлтийн хамгаалалттай “Active Side Guard Assist 2” багтжээ. Сүүлийн 2 системийг 2027 оноос үйлдвэрлэх Каскадиад суурилуулна.
Эдгээрээс “Cross Traffic Assist” нь уулзвар дээр машины урдуур хөндлөн гарах тээврийн хэрэгслийг илрүүлж, мөргөлдөх эрсдэлтэй бол дуут болон дүрсэн дохио өгнө. Нөхцөл байдлаас шалтгаалан тоормосыг хэсэгчлэн эсвэл бүрэн гишгэж чадна.
“Active Side Guard Assist 2” нь зорчигчийн талын аюулыг хянахаас гадна зүүн эргэх дохио өгсөн үед өөдөөс ирж, машины замыг хөндлөн гарах тээврийн хэрэгслийг илрүүлнэ. Европын зах зээлд зориулсан “Active Sideguard Assist 3” нь үүнээс өөр систем юм.
Уулзвар дахь мөргөлдөөний эрсдэлийг бууруулна
Даймлерын “Active Cross Traffic Assist” нь ачааны машины замыг хөндлөн гарах автомашин, мотоциклийг мэдрэгчээр илрүүлж, жолоочид анхааруулна. Нөхцөл байдал эгзэгтэй болбол автоматаар бүрэн хүчээр тоормослох боломжтой.
Орегон дахь туршилтын талбайд хуурамч автомашиныг ачааны машины урдуур гэнэт гаргахад эхний удаа мөргөлдөхөөс зайлсхийж, дараагийн удаа шүргэсэн ч ноцтой гэмтээгүй байна. Туршилтуудын ихэнхийг 40-55 миль/цаг (64-89 км/цаг) хурдтай хийжээ.
Радар, камер аюулыг илрүүлнэ
“Active Brake Assist 6” нь ойрын зайн 4 радар, холын зайн 1 радар, олон зориулалттай камер ашиглан машины эргэн тойрны ойролцоогоор 270 градусыг хянана. Мөн 53 фут (16.15 м) урт чиргүүлийн дагуух аюулыг тооцоолж чадна.
Систем нь хөдөлгөөнтэй болон зогсож буй тээврийн хэрэгсэл, явган зорчигч, дугуйчдыг илрүүлнэ. Түүнчлэн замын муруйд зогссон, хэд хэдэн эгнээ дамнан байрласан, эсвэл ослын дараа ердийн бус өнцгөөр зогссон машиныг таньж, шаардлагатай үед тоормослох зориулалттай.
Жолоочийн анхаарал, эгнээг хянах систем
“Active Lane Assist 2” нь ачааны машиныг эгнээндээ явахад тусалж, санамсаргүйгээр эгнээнээс гарах хөдөлгөөнийг засна. Харин “Attentive Driver Protection” нь жолооч хариу үйлдэл үзүүлэхээ больсныг тогтоовол машиныг зогсоож, эгнээнийх нь голд байлгахыг оролдон, ослын гэрлийг асаана.
Технологи жолоочийн хариуцлагыг орлохгүй
Системийн үр нөлөө нь замын нөхцөл, мэдрэгчийн ажиллагаа, машины тохиргоо, жолоочийн анхаарлаас хамаарна. Мэдрэгчид орчны нөхцөл нөлөөлж болзошгүй бөгөөд ямар ч систем бүх ослоос сэргийлэх баталгаа болохгүй.
Тиймээс жолооч зайгаа барих, хурдаа тохируулах, толио шалгахын зэрэгцээ хүнд даацын машины хэмжээ, эргэлтийн онцлогийг тооцох шаардлагатай хэвээр юм.
Эх сурвалж: New Atlas
