АНУ-д өвчтөнүүд антибиотикийн жор авахын тулд эмчид шинж тэмдгээ зохиож хэлэх, эсвэл хэтрүүлэх тохиолдол цөөнгүй байгааг шинэ судалгаа харуулжээ. Ингэхдээ антибиотикоор эмчилдэггүй халдварын шинж тэмдгийг голдуу дурддаг ч хүссэн жороо ихэвчлэн авдаг байна.
Ютагийн их сургуулийн Алистер Торпоор ахлуулсан баг 1,000 гаруй насанд хүрэгчийн цахим асуулгын мэдээлэлд дүн шинжилгээ хийсэн харилцан холбоотой 2 судалгааг баасан гарагт “JAMA Network Open” сэтгүүлд нийтлүүлжээ.
Оролцогчдын дөрөвний нэгээс илүү нь өөртөө эсвэл асран халамжилж буй хүүхдэдээ антибиотикийн жор авахын тулд эмчид дор хаяж 1 удаа худал хэлж байснаа мэдэгджээ. Хамгийн түгээмэл дурдсан шинж нь халуурах, ханиалгах, хоолой өвдөх байв. Гэвч ханиадыг антибиотик үйлчилдэг бактери бус, вирус үүсгэдэг.
Худал хэлсэн насанд хүрсэн өвчтөнүүдийн 77 хувь, асран халамжлагчдын 87 хувь нь хүссэн антибиотикийн жороо авч чадсан гэж хариулжээ. Судлаачид энэ нь жор бичих шийдвэр, антибиотикийн зохистой хэрэглээ, нийгмийн эрүүл мэндэд тулгамдсан асуудал байгааг харуулж байна гэж дүгнэв.
Хүмүүс яагаад худал хэлдэг вэ?
Цахим асуулгад оролцсон 1,371 хүний 959-ийнх нь хариулт хүчинтэй, бүрэн байжээ. Тэдний 268 буюу 28 хувь нь антибиотик авахын тулд шинж тэмдгээ худал мэдүүлсэн байна. Үүнээс 108 нь шинж тэмдгээ хэтрүүлж, 19 нь зохиож, 141 нь хоёуланг нь хийжээ.
Өөрийгөө асран халамжлагч гэж тодорхойлсон 263 хүний хариултад тусад нь дүн шинжилгээ хийхэд 63 буюу 27 хувь нь хүүхдэд антибиотик авахын тулд шинж тэмдгийг нь худал мэдүүлсэн гэжээ.
Худал хэлсэн хүмүүс өөрийнхөө эсвэл хүүхдийнхээ өвчнийг хүнд гэж үзсэн, антибиотик л тусална гэж итгэсэн, ажил, сургуульдаа хурдан эргэж орохыг хүссэн зэрэг шалтгаан дурджээ. Мөн зарим нь эмчилгээгээ өөрөө шийдэх ёстой гэж үзсэн байна.
Шинж тэмдгээ худал мэдүүлсэн хүмүүсийн 65 хувь нь ханиадны шинж тэмдгийг дурдсан бол 49 хувь нь ходоодны зовиур, 46 хувь нь үе мөч, булчингийн өвдөлтийг худал мэдүүлжээ.
Нортвестерн их сургуулийн Файнбергийн анагаах ухааны сургуулийн Жеффри Линдер судалгааг дагалдуулан бичсэн тайлбартаа, асуулгад дурдсан 8 төрлийн шинж тэмдгийн ердөө 1 нь буюу шээсний замын шинж тэмдэг л антибиотик бичих тодорхой үндэслэл болно гэжээ.
Антибиотикийн зохисгүй хэрэглээний эрсдэл
Антибиотикийг буруу, хэтрүүлэн хэрэглэх нь эмэнд тэсвэртэй халдвар үүсэж, тархахад нөлөөлдөг. АНУ-ын Өвчний хяналт, сэргийлэлтийн төвийн шинэчилсэн тайланд дурдсанаар, эмэнд тэсвэртэй бактери, мөөгөнцөр АНУ-д жил бүр 9.7 сая халдвар, 50,800 нас баралт үүсгэж байна.
Жеффри Линдерийн үзэж буйгаар, шаардлагагүй антибиотик нь ашиг тусгүйгээс гадна гаж нөлөө, харшлын урвал үүсгэж, биеийн хэвийн бичил биетний тэнцвэрийг алдагдуулах эрсдэлтэй. Мөн өвчтөн, эмчийн хоорондын итгэл сулрах нь санаа зовоож байна гэжээ.
“Өвчтөн өөр зүйл хүссэн, бидний шийдвэрт дургүй байсан, эсвэл шинж тэмдгийнхээ талаар худал хэлсэн ч эмчийн үүрэг бол өвчтөний эрх ашгийн төлөө ажиллах юм” гэж Линдер бичжээ. Харин Ютагийн их сургуулийн Алистер Торпоор ахлуулсан баг өвчтөнүүдийн санаа зовнилыг ойлгож, антибиотикийн зохистой хэрэглээний талаар илүү сайн тайлбарлах шаардлагатай гэж дүгнэв.
Эх сурвалж: Ars Technica
