Хиймэл оюун ухаан кино урлагт хэрхэн нөлөөлөх тухай маргаан өрнөж буй энэ үед Хятадад AI технологийг үйлдвэрлэлийн бүхий л үе шатанд ашиглан бүтээсэн бүрэн хэмжээний уран сайхны кино кино театруудаар гарч эхэллээ.
Гэвч технологийн шинэчлэлээрээ олны анхаарлыг татсан уг бүтээл нээлтийн өдрүүдэд үзэгчдийг төдийлөн татаж чадсангүй.
“Sanxingdui: Future Past” нэртэй шинжлэх ухааны уран зөгнөлт, триллер төрлийн кино 2026 оны аравдугаар сарын 23-нд Хятадын кино театруудад нээлтээ хийжээ. Тус бүтээл нь хиймэл оюун ухааныг кино үйлдвэрлэлийн үндсэн үйл явцад ашиглаж, албан ёсны кино театрын үзвэрийн зөвшөөрөл авсан анхны томоохон хэмжээний бүтээлүүдийн нэг болж байна.
Хоёр жилийн хугацаанд 100 орчим хүн бүтээжээ
“Bona Film Group” компанийн мэдээлснээр уг киног бүтээхэд 100 орчим хүн хоёр гаруй жилийн турш ажилласан бөгөөд үйлдвэрлэлийн зардал нь 10 сая юань буюу ойролцоогоор 1.5 сая ам.доллар давжээ.
Киноны гол дүрүүд, тэдгээрийн дуу хоолой болон арын орчны дүрслэлийг хиймэл оюун ухаанаар үүсгэсэн байна. Үйлдвэрлэлийн явцад 1.2 сая гаруй эх дүрслэл ашиглаж, киног бүхэлд нь 100 гаруй удаа дахин боловсруулсан гэж мэдээлжээ.
Гэхдээ энэ нь AI бүх ажлыг хүний оролцоогүйгээр хийсэн гэсэн үг биш юм. Зохиол, найруулгын шийдэл, дүрийн дизайн, кадрын сонголт, эцсийн уран сайхны шийдвэрүүдийг мэргэжлийн баг гаргасан байна. Өөрөөр хэлбэл, хиймэл оюун ухаан нь дүрслэл бүтээх гол хэрэгсэл байсан бол хүмүүс бүтээлч удирдлага, хяналт, засварлах ажлыг хариуцжээ.
Ирээдүйд хиймэл оюун ухаан хүн төрөлхтний шийдвэрийг орлох уу?
Киноны үйл явдал хиймэл оюун ухаан дэлхий даяар давамгайлж, хүн төрөлхтөн өөрсдийн шийдвэр, сонголтыг алгоритмд даатгасан ирээдүйд өрнөдөг.
Энэ үед дэлхий нийтийг хамарсан хямрал үүсэж, түүнийг шийдвэрлэх түлхүүр нь Хятадын эртний Саншиндуйн соёл иргэншлээс үлдсэн долоон нууц тэмдэг болохыг хүмүүс олж мэднэ. Эдгээр тэмдэг нь 3,000 орчим жилийн өмнөх хүрэл эдлэлүүд дээр дүрслэгдсэн нууцлаг дүрсүүдтэй холбоотой аж.
Ийнхүү эртний соёл иргэншил, ирээдүйн технологи, хиймэл оюун ухааны аюул зэрэг сэдвийг нэгтгэсэн нь киноны гол онцлог юм.
Нээлтийн орлого үйлдвэрлэлийн зардлаа нөхөж чадсангүй
Технологийн хувьд томоохон туршилт болсон ч киноны арилжааны эхлэл тийм ч амжилттай байсангүй.
Хятадын тасалбар захиалгын “Maoyan” платформын мэдээллээр нээлтийн өдөр уг киноны 10,000 гаруй үзвэр товлогдсон байжээ. Гэвч тухайн өдрийн оройн байдлаар тасалбарын орлого 290,000 юань буюу ойролцоогоор 43,000 ам.долларт хүрсэн байна. Нээлтийн өмнөх таамаглал болон эхний орлогын үзүүлэлтүүд нь 10 сая юаниас давсан үйлдвэрлэлийн зардлаас хол доогуур байв.
Үзэгчдийн сэтгэгдэл ч харилцан адилгүй байжээ. Урьдчилсан үзвэрт оролцсон нэгэн үзэгч киноны чанарт сэтгэл хангалуун бус байсан тул тасалбар худалдаж авахгүй байсан гэж ярьсан байна. Харин хиймэл оюун ухаанаар бүтээсэн дүрслэл “Avatar” зэрэг томоохон киноны түвшинд хүрвэл үзэхийн тулд мөнгө төлөхөд бэлэн гэдгээ илэрхийлжээ.
Энэ нь үзэгчид шинэ технологийг сонирхож байгаа ч зөвхөн AI ашигласан гэдэг шалтгаанаар кино театрт очиж мөнгө төлөхгүй байгааг харуулж байна.
AI кино урлагийг орлох уу, эсвэл шинэ боломж нээх үү?
Хятадад хиймэл оюун ухаанаар бүтээсэн богино хэмжээний видео, олон ангит бүтээлүүдийн хэрэглээ эрчимтэй өсөж байгаа юм. “Douyin” платформ дээр л гэхэд 2026 оны есдүгээр сард AI-аар бүтээсэн богино драмууд нийт 200 тэрбум гаруй удаа үзэгджээ.
Гэвч богино хэмжээний контент амжилттай байгаа нь үзэгчид бүрэн хэмжээний AI киног кино театрт үзэхэд бэлэн гэсэн үг биш юм.
Нөгөө талаас AI технологи жүжигчид, дуу оруулагчид, аниматорууд болон бусад уран бүтээлчдийн ажлын байранд хэрхэн нөлөөлөх тухай асуудал ч хурцаар тавигдаж байна. Мөн хүний дүр төрх, дуу хоолойг зөвшөөрөлгүй ашиглах, зохиогчийн эрх болон бүтээлийн эзэмшлийн асуудлууд шийдлээ хүлээж байна.
“Sanxingdui: Future Past” кино нэг зүйлийг тодорхой харууллаа. Хиймэл оюун ухаанаар бүрэн хэмжээний кино үйлдвэрлэх боломж хэдийн бий болсон ч технологийн боломж болон үзэгчдийн сэтгэлд хүрэх уран бүтээл хоёр өөр зүйл юм. Цаашид AI кино урлагийн салбарт хэрхэн байр сууриа олохыг энэ төрлийн бүтээлүүдийн чанар, үзэгчдийн хүлээн авалт, эдийн засгийн үр дүн шийдэх бололтой.
