Цангис жимсэнд агуулагдах байгалийн нэгдлүүд амны хөндийн эрүүл мэндэд тустай байж болохыг судлаачид тогтоожээ. Чикаго дахь Иллинойсын их сургуулийн Шүдний эмчийн сургуулийн судлаач Кристин Ву цангисын шүүс шүдийг хортой бактериас хамгаалахад нөлөөлөх эсэхийг судалсан байна.
Цангисын шүүс бактерид хэрхэн нөлөөлдөг вэ?
Цангисын шүүсийг шээсний замын халдвараас сэргийлэхэд эртнээс хэрэглэж иржээ. Цангист агуулагдах проантоцианидин хэмээх нэгдэл үрэвслийн эсрэг үйлчилгээтэй бөгөөд гэдэсний савханцар зэрэг зарим бактерийг эсэд наалдахад саад болдог байна.
Ву уг нэгдэл шүдний өнгөрт агуулагдах бактерид мөн нөлөөлөх эсэхийг судлахыг зорьжээ. Эдгээр бактери хоол, ундааны сахараар тэжээгдэж, шүдний пааланг аажмаар сулруулан цоорол үүсгэдэг хүчил ялгаруулдаг.
Судлаач цангисын нэгдлийг дангаар нь туршихын оронд хүмүүсийн худалдан авч хэрэглэж болох цэвэр шүүсийг сонгожээ. Ву хэлэхдээ, “Сахарын хор нөлөө хооллолттой холбоотойн адил бидний идэж, уудаг зүйл хортой бактеритай тэмцэж, амны хөндийн эрүүл мэндэд хэрхэн тустай байж болохыг сонирхож байна” гэв.
Шүдний өнгөрт үзүүлэх нөлөөг туршжээ
Судалгаанд 14 хүүхэд, 8 насанд хүрэгч зэрэг нийт 22 хүн оролцов. Тэдэнд чихэр нэмээгүй 100%-ийн цангисын цэвэр шүүс, 27% шүүс болон сахар агуулсан цангисын ундаа, эсвэл усны аль нэгийг санамсаргүй байдлаар оноожээ.
Судлаачид туршилтын өглөө оролцогчдын шүдэнд шөнийн турш тогтсон өнгөрөөс дээж авчээ. Оролцогчид амаа усаар зайлсны дараа оноосон ундаанаас 3 удаа бага хэмжээгээр авч, амаа хэд хэдэн удаа зайлаад залгисан байна.
Үүнээс 30 минутын дараа судлаачид өмнө нь дээж аваагүй шүднээс дахин өнгөр авч харьцуулжээ. Ингэснээр ундаа тус бүр шүдний өнгөрт богино хугацаанд хэрхэн нөлөөлснийг шинжилсэн байна.
Цэвэр шүүс өнгөр, хүчил үүсэхэд нөлөөлжээ
Чихэр нэмээгүй цангисын цэвэр шүүстэй харьцсан шүдний өнгөр уг шүүстэй харьцаагүй өнгөрийн дээжтэй харьцуулахад илүү удаанаар дахин ургажээ. Мөн цэвэр шүүсээр амаа зайлахад хүүхэд, насанд хүрэгчдийн шүдний өнгөр дэх хүчил ялгаралт багассан байна.
Энэ үр дүн цангисын шүүс шүд цоороход нөлөөлдөг өнгөр хуримтлагдах, хүчил ялгарах гэсэн 2 үйл явцад саад болж болзошгүйг харуулжээ. Ву цаашид амны хөндийн эрүүл мэндэд тустай ундаа хөгжүүлэх боломжтой гэж үзэж байна.
Амны хөндийн арчилгаанд хэрэглэж болох уу?
Гэвч 22 хүнийг хамруулж, шүүс ууснаас хойш ердөө 30 минут ажигласан энэ судалгаа цангисын шүүсийг тогтмол хэрэглэхэд шүд цоорохоос сэргийлэх эсвэл урт хугацаанд үр дүн өгөх эсэхийг тогтоож чадахгүй. Үүнийг мэдэхийн тулд илүү олон хүнийг хамруулсан, урт хугацааны судалгаа шаардлагатай.
Ву цангисын цэвэр шүүсээр хааяа амаа зайлах боломжтой гэж үзэж буй ч шүүсний исгэлэн амт зарим хүнд тааламжгүй байж болохыг онцолжээ. Амтыг нь зөөлрүүлэхийн тулд тохиромжтой сахар орлуулагч нэмж болох юм гэж тэр хэлсэн байна.
Энэхүү судалгааны өгүүлэл “Scientific Reports” сэтгүүлд нийтлэгджээ.
Эх сурвалж: Sciencedaily
